Na Aruba a inaugura "Victoria's Secret Travel & Tourism"
Victoria’s Secret ta un compania mericano cu a nace na San Francisco,
California na aña 1977 door di Roy Raymond, un graduado di
Universidad di Stanford. E storia di Roy ta interesante y di berguensa,
el a dicidi di crea esaki dia cu el a haya su mes ta cumpra lingerie
pa su casa den un tienda pa departamento… di ey e idea di crea un
tienda pa e tipo di producto ey so y cu un servicio mas personalisa.
Actualmente Victoria’s Secret ta e compania mas grandi di lingerie na
Merca y e ta pertenece na Limited Brands Inc. Su gama di producto
tambe a crece, awor no ta solamente lingerie pero tambe productonan
di beyesa, y su benta via catalog cu ta ofrece tambe paña y
sapato ta haci e bida di hende muhe mas facil!
E parti mas fascinante di e compania multi miyonario aki ta e boom
cu el a causa na aña 1990 ora cu nan a dicidi di bin cu un cambio
den nan mercadeo, un cambio publicitario, cual ta haci uso di Top
Models renombra pa promove nan producto. Despues di a ricibi e
aceptacion nan a bin cu e idea cual awor ya caba ta wordo haci
anualmente, the Victoria’s Secret Fashion Show, cu ta wordo televisa
en bibo… Un show luhoso y cu piesanan super elabora, musica
super trendy, cu cantantenan invita pa forma parti di e evento y sin
laga atras un setup cu ta cambia dependiendo di e tema. Tur esaki ta
haci di e show un atraccion tanto pa celebridadnan y hendenan den
e mundo di entretenimento.
Un aspecto cu no por keda sin wordo menciona ta e Victoria’s Secret
Angels! E brand mas gusta door di e uso di Top Models. El a cuminsa
na aña 1997 pa un campaña publicitario; Helena Christensen, Karen
Mulder, Daniela Pestova, Stephanie Seymour y Tyra Banks. Door di
su popularidad, na aña 1998 e Angelnan a haci nan prome runway.
Di ey e line-up di e modelonan a cambia durante e añanan, e mas
reciente Angel ta e hulandes Doutzen Kroes. Hopi modelo ta wordo
contrata pa desfila y traha pa nan, pero no tur ta yega di forma parti
di e Victoria’s Secret Angels…
Actualmente Aruba tambe ta forma parti di Victoria’s Secret su
imperio, cual recientemente a inaugura su tienda “Victoria’s Secret
Travel & Tourism” den caya grandi di Oranjestad. Un concepto nobo
pa tanto local como turista. Nos di Focus team kier desea nan tur
clase di exito..!...
“Si bo no tin e attitude
bo ta simplemente
un Maniquin”
Richeilla su estilo ta uno hopi
varia y tur cos ta depende
riba su mood. E por bisti
facilmente algo cu hopi color
awe y mayan bisti algo preto.
E ta un persona hopi alegre
cu ta gusta hari y un bon
ambiente. E ta considera su
mes hopi outgoing, down
to earth y easy to talk with.
Aunke tin biaha e no tabata
planea pa gasta placa den
shopping, pero toch tin varios
motibo pakico e no por resisti
di keda sin cumpra algo.
Pa abo ta hopi importante pa bo vestuario
coincidi cu e dress code cu e ocasion ta
rekeri?
Sigur cu si! Mi ta gusta bisti apropia pa tur
ocasion y si mi mester bay shop pa un ocasion
special mi ta hasi esaki cu mucho gusto tambe.
Kico ta indispensable den bo tas?
Mi Blackberry, mi blush, eyeliner, mascara y
lipgloss
Richeilla signature look:
Mi ta gusta bisti high heels y semper, whenever
possible, eyecatching accessoires
Un designer cu lo bo kier bisti un creacion
di dje?
Nunca mi a echt pensa riba un pregunta asina.
Mi no ta un hende cu ta cumpra algo paso e ta
un ‘cierto’ marca, pero mas tanto mi ta cumpra
un paña paso e ta keda mi fabuloso.
Pero si mi mester scohe un designer esey ta Percy Irausquin
pa e simpel motibo cu e tabata un designer Arubiano y mi ta
haya su pañanan hopi bunita y elegante.
Kico ta bo ‘touch’ pa dress 2 impress?
Attitude! Bo por ta “up and top all brands” pero si bo no tin e
attitude bo ta simplemente un “Maniquin”.
Kico bo ta haya espectacular pero cu bo no lo durf bisti?
Cierto pañanan cu ta show too much skin mi no ta durf di bisti.
E no ta den mi personalidad pa mustra demasiado, pero tin
pañanan cu mi ta haya espectacular.
Cua celebridad bo ta identifica cu su estilo?
Mi no por identifica mi mes cu un celebrity paso tin diferente
celebridad cu mi ta haya cu ta bisti nice. Pero mi ta adora con
Khloe Kardashian, Jennifer Aniston, Jessica Alba y Cameron
Diaz ta bisti.
“Djis zorg pa bo tin un bon
y bunita Tas, Holoshi y Bril”
Den ki volgorde bo ta dress?
Mi ta cuminsa ta kies mi paña pa e ocasion, despues sapato
y na ultimo mi accesorionan.
Cua ta bo colornan predilecto?
Mi colornan preferi ta preto y bright rose. Preto paso e ta un
color cu por disimula hopi y e ta un color chique. “U can never
go wrong with Black”. Bright Rose paso mi ta djis gewoon
weg haye un Diva-color y un color cu attitude y self-esteem.
Con bo ta prepara bo maleta pa ora di biaha?
Mi ta check prome kico ta e motibo di biahe y unda tur mi lo
bai durante di e trip, dependiendo di esey mi ta prepara mi
maleta.
Ki por hasi cu bo lo no por keda sin cumpra algo aunke bo
no kier gasta un suma astronomico?
(Hari)… Tin hopi cos cu por lagami shop toch aunke cu mi no
tabata kier a gasta placa. Mi ta bay djis menciona algun di e
motibonan aki:
1. Ora cu un paña of accesorio ta pa un tempo so den moda
anto mi echt kier’e tambe.
2. Ora cu mi drenta ‘cierto’ lugarnan, tin ora mi gewoon weg
no por sali man bashi.
3. Ora cu mi pas un paña of accesorio anto mi a keda fabuloso.
Bo ta considera bo mes un shop-a-holic?
Mi no sa si mi mester yama mi mes esey pero mi tin mi
momentonan cu mi ta echt shop hopi y despues atrobe
temporadanan ‘rustig’. Mi ta biaha regularmente dus mayoria
di mi pañanan mi ta cumpra den exterior.
Bo fashion icon?
Honestamente mi no tin un fashion icon! Djis zorg pa bo tin un
bon y bunita tas, holoshi y bril. Siña mix & match bo pañanan
y “Accessorize”!
...
Seychelle Koolman
Garando tur oportunidad pa triunfa den Modelahe Internacional
Focus video section
Pronto focus lo introduci un section special di video.
Duquesa di York y su dos yiu muhernan, ken lo sigui patronchi di ken? Beatrice y Eugenia ta dos persona completamente diferente, pero cu patronchi kisas conoci caba pa e mundo di farandula.
Fergie, manera e ta conoci popularmente, ta rebiba su fama
perdi di realeza cu e escandalo aki di cual nan ta tild’e di ta
"inmoral", pero mas cu tur cos, ‘bruta” pa e facilidad cu el a
cay den e trampa di News of the World. E duquesa di York a
pidi pordon y a bisa cu e ta arepenti di cay den e engaño di dicho
revista Britanico.
Ta hopi interesante cu mescos cu Reina Isabel II semper a cuida
y protege su ruman menor: cual tabata hopi rebelde y poco convencional,
esta Princesa Margarita, awo ta e famia Real Ingles tin 2
ruman muher, nieta di Reina Isabel, cu a adopta e mesun rol!
Despues di e escandalo di nan mama Sarah, cu tabata un topico
asina comenta na tur parti mundo y den tur revista nacional como
internacional, nos ta bay papia di e Princesanan Beatrice di casi 23
aña y su ruman menor di 20 aña, Princesa Eugenia. Ambos yiu ta
hopi diferente y Beatrice, e mayor, semper ta purba di saca cara
pa su ruman menor.
Beatrice, recientemente a perde hopi peso y asta a core den e
ultimo maraton di London. E tin un imagen cla di ambos mayor,
su cabey cora y su boca grandi, cu ta combina e gennan di e
Ferguson cu esun di e Windsor, sino cu e caracter ta mes atrevi
cu Fergie. E ta biba sin compleho, cu entusiasmo pa tur cos y sin
preocupa pa nada di loke nan ta bisa.
Eugenia ta un version hopi mas bunita di e gennan familiar ey. E
tin bunita wowo, considera "un poco misterioso", mescos cu su
tia abuela Princesa Margarita ta’tin. Mescos cu Beatrice, nan tin
e tendencia di bira gordo y subi y baha peso na estilo di ‘yo-yo’.
Su caracter ta mas reserva, manera di su tata y e no ta comparti e
amor pa fama, cual su mama y su ruman si tin.
Den un reciente y poco usual entrevista cu e Princesa Beatrice
ta'tin cu Daily Mail, el a comenta cu Eugenia lo desea pa ta un
persona mas priva.
"E lo bandona "mañan" mes su bida di luho, vakantie, comodidad
y 24 ora di seguridad y supervision policial, si e por a biba manera
un mucha muher normal".
Beatrice a confesa cu su ruman "ta sintie persigui, casi acosa, ora
cu nan ta forza nan pa pose pa video of potret … Mi ta compronde,
pasobra e interes den nos ta exagera. Ademas, nan ta skirbi cosnan
hopi mahos y tin ora ta inventa cosnan absurdo"
Ambos tin nan pareha. Beatrice ta novia di e Mericano Dave Clark,
cual di su tata ta un abogado miyonario cu tin hopi aña na Inglatera
y Eugenia tabatin un novio durante 5 luna, Otto Brockway, pero
dia cu el a haci 20 aña, Otto no tabata presente y ta’tin rumor ta
circula cu nan lo a termina. Eugenia tin rabia ora cu nan puntr’e a
su bida amoroso. Segun un amigo: "Otto tin cu biaha pa su trabou
y Eugenia a regresa Universidad di Newcastle; asina 'ki un relacion
no por funciona cu apenas a cab'i cuminsa."
Hopi ta puntra, Eugenia ta e version nobo di Margarita di Inglatera?
Beatrice semper ta bay ta e protector di su ruman menor? Cua
di nan lo sigui e paso di nan mama, den e mundo di escandalo?
Tempo lo dicidi.
E Reina di Carnaval 2000
awor tin su prinses cu a
nace 09-09-09 pa 9.30 di
mainta. Chastity Hodge y su
futuro casa Drs. Robert Kock
ta pose hunto cu nan baby
Caithlyne Monique Gabriela den
e camber bunita decora cu e
tema di Hello Kitty, net 12 dia
despues cu nan yiu muher a
bin na mundo. El a pisa7 liber
y mey y cu un largura di 53
centimeter.
Chastity Hodge awor mama di un
yiu muher… con bo ta sinti bo?
Mi ta sinti mi un muher realisa, hopi
contento di por a procrea un bida nobo
y cu ta forma parti di mi y mi herencia
familiar. Traha a base di un bunita amor
entre ami y mi pareha.
Bo tabata sa sexo di bo baby prome
cu el a nace?
Mi por bisa cu si, mi deseo for di
inicio di mi embarazo tabata pa un
yiu muher y despues di a puntra e
ginecologo el a confirma mi tres biaha
cu e palabranan: “Ja, nog steeds un
flinke meisje”.
Y con bo a pasa bo embarazo?
Mi embarazo a bay hopi bon mes, danki
Dios mi no a sufri di e malestarnan cu
normalmente bo ta haya. Solamente
e tension pa tur cos bay bon durante
parto, ya cu ta trata di mi prome yiu.
Bo a scoge un fecha unico 09-09-09
pa bo cesaria…
E fecha realmente bisa, no ta ami a
scog’e sino mi dokter y pa casualidad
el a cay e dia aki, mesora mi pareha y
ami a bay di acuerdo cu esaki. Alabes
el a nace 9:30 a.m., pues cuatro biaha
9.
E nomber di bo baby ta? Y ken a
scoge y e tin un nificiacion special
pa boso?
E nomber di e Baby Girl ta Caithlyne
Monique Gabriela Kock. Ami a scog’e
prome nomber. Caithlyne mi a wak den
un pelicula y un di e artistanan tabata
tin e nomber aki y mi a keda encanta
cu ne. E di dos nomber, mi pareha y
ami a scoge. Monique ta mi di dos
nomber. E nomber Gabriela, tata di mi
pareha a scoge, cu ta e di dos nomber
di Caithlyne su wela band’i tata.
Nificacion di e nomber Caithlyne ta:
puresa mescos cu e nomber Chastity,
esaki ta puro casualidad.
Con e yegada di e baby aki tabata
den e famia?
Waw… un alegria inmenso, ya cu den
mi cas ami ta e unico yiu y awor nos
a haya un prinses. Den e famia di mi
pareha, e baby ta e nieta di mas chikito
awor.
Bo ta unico yiu muher y awor un
otro prinses den cas…
Wel awor mi mama porfin a haya un
otro prinses den cas. Ya prome cu e baby a nace, e camber completo y su pañanan
tabata cumpra y prepara for di 2 luna adelanta.
Entusiasmo pa e yegada di baby tabata grandi
y ya prome cu e nacemento hopi consenti pa
su wela Carla, esta mi mama.
Ki e baby tin di bo y di su tata?
Ora e baby a nace tur hende cu a wak e, a bisa
mesora cu e ta parce su tata, pero despues cu
algun dia a pasa nan ta wak algo di mi toch den
dje. Pa nos, e ta parce nos tur dos, ban wak
segun e crece ken e ta parce mas.
Con e prome dianan cu e miembro di famia
den cas tabata?
Wel, hopi contento pero tambe hopi trabou, ya
cu e ta exigi hopi tempo y atencion di nos, pero
si hopi dushi. Un cambio grandi den mi rutina,
pero masha dushi mes.
Robert y Chasity ta e
productornan di “The Chaz
Club, TCC” cu ta nan
mesun programa di TV
Chastity awor mama… ki ta e siguiente
paso?
E siguiente paso grandi den mi bida lo ta
mi matrimonio, cu ta na luna di december
venidero, p’asina nos famia por haya e
bendicion di Señor.
Despues di un relacion sentimental di
cuanto aña ta nace e fruto di boso amor?
Despues di un bunita relacion cu a cuminsa na
februari di 2007, cual awor ta 2 aña y mey cu
a pasa, a nace e regalo di mas grandi di nos
amor.
Conta nos un poco di tata di bo yiu y futuro
esposo…
Mi pareha ta drs. Robert Kock, mi a conoce
na trabou. Nos a inicia cu un bunita amistad
cu despues di un par di luna, a crece den un
relacion basa riba confiansa masha grandi
mes. E ta un persona hopi sincero, cu hopi
comprension pa cu e mundo cu mi ta aden,
cual hopi biaha ta exigi hopi tempo di mi.
Pero a resulta cu e tambe ta posee un talento
grandi pa cu e mundo aki y awor ta yuda mi
den nos produccion di television cu nos a
yama “Rochaz Productions”. E ta posee un
tremendo talento pa filmacion y editing. Y
naturalmente, mi scol di Modelahe y Talento,
mi pareha tambe ta forma parti di dje. Robert a
studia na universidad di Groningen na Hulanda
como Biologo y a specialisa den Biologia
Marino. E tin un stimacion grandi pa loke el a
studia p’e.
Bo ta den plenitud di bo felicidad?
Sigur cu si! Mi ta sinti cu mi bida a haya un
estimulo mas grandi awor cu mi a forma un
famia di mi mes. Basa riba un educacion
excelente cu mi a haya di mi mayornan, cu
semper a stima otro y nos cas tabata uno yena
cu amor. Basa riba un educacion cu awor lo
mi ehecuta den mi hogar, hunto cu mi pareha
Robert y mi Prinses Caithlyne y tur esnan cu
lo bin pronto. (Hari) Un team di futbol si ta pa
mi… mi ta stima mucha.
Rudolfo
Valentino
Croes
E comico crioyo ta “Back in town”
Tabata riba 5 di november 1951, cu Vale Croes a pone e prome
sonrisa riba e cara di su mayornan. Un persona cu desde mucha
tabata un comico y na grandi el a actua den diferente comedia.
Ken por a pensa cu dia Vale a subi escenario na aña 1973 pa
prome biaha, tabata e inicio di un carera diferente y humoristico.
E ta cantante di ranchera, comediante faborito di tur e islanan y
dos biaha el a keda eligi como: Prins der Prinsen.
Kico a influencia bo pa bay den actuacion humoristico?
Desde chikito caba mi tabata gusta haci cos pret y ora cu m’a bira
mas grandi m’a actua den diferente comedia. Durante un eleccion
di Reina di SAC na aña 1973, na Connie Francis, Santa Cruz,
e muchanan di Sensacion del Caribe hunto cu e m.c. Johnny
Habibe a bisa mi pa subi escenario y conta chasco. Esey tabata
e prome biaha cu mi a subi escenario y conta chiste pa publico.
Con bo ta crea bo chistenan y actuacion?
Ora un cos pasa den bo bida sea bo ta hari of yora. Ami ta mira e
momentonan chistoso di bida y traha nan na chasco. Esaki mi por
haci masha bon mes. Tambe mi ta lesa hopi y tende for di hende,
radio of television.
Duna nos un aspecto pret di e proceso ora cu bo ta skirbi bo
chistenan.
Ora cu mi ta purba conta un chasco nobo, cu segun mi e ta bon,
anto e reaccion di e hendenan cu ta scuchando mi, ta haci mi
masha nervioso mes.
E comeback...con e aceptacion di e publico Arubiano tabata
despues di 10 aña?
E “Come-Back”, manera nos ta yam’e, ta debi cu e publico
Arubiano tabata anhela mi regreso. Cada bes nan tabata bisa mi:
“Ki dia tin show atrobe?”
Y awor cu m’a bin bek, e aceptacion tabata unanime, pues un
aceptacion total!! Mi mester bisa cu mi ta feliz y contento cu m’a
nace na Aruba, Dios no por a duna mi miho regalo. Bendiciona
sea e Shelo riba nos cabez y hunto cu nos Tata Celestial y Hesus.
Tin algo cu bo fanaticonan a keda sorprendi di bo?
Cu despues di tanto tempo mi ta mescos, pero mas brabo cu
nunca!!! Nan lo a keda sorprendi di mira mi cu renchi orea.
Como comediante, bo a yega di tin un momento menos
agradabel?
E momento cu mas por pisa pa un comediante, ta e reaccion di
su publico. Djis purba di imagina un publico cu no ta hari! Claro cu
el a yega di pasa cu mi y esey ta un situacion cu mi no ta desea
pa ningun comediante pasa aden.
Bo ta un figura cu sigur mester a siña anda cu critica. Con bo
ta haci esaki?
Critica mester ta un instrumento cu ta yuda bo trata cu e realidad.
Loke mi haya na critica, mi ta pon’e riba un rij, despues mi ta
purba di drecha loke tin pa drecha y elimina e otronan.
Ken ta bo comediante faborito?
Esey ta Richard Pryor, un comediante y actor Mericano y famoso,
lamentablemente ya el a fayece. Aunke tin algun mas, manera:
Alvarez Guedues (Cubano, biba na Miami) y hopi di Hulanda.
Kico ta bo filosofia di bida?
Bida ta cortico! Kibra e reglanan. Pordona liher. Stima
sinceramente, hari incontrolablemente.Y no arepenti di nada
cu a pone un sonrisa riba bo cara!
